Jer 6 | ZomZIV | STEP | Benjamin mite aw, na suahtak nadingun tai un! Jerusalem taisan un! Tekoa ah pengkul mut un! Beth Hakkerem tungah dialkhai khai un! Ahang in, leilu-lam panin gimna hu lianpi le a lauhuai suksiatna hong kuankhia hi.

Jeremiah 6

Jerusalem Ki-umcih

1 Benjamin mite aw, na suahtak nadingun tai un!
Jerusalem taisan un!
Tekoa ah pengkul mut un!
Beth Hakkerem tungah dialkhai khai un! ^a
Ahang in, leilu-lam panin
gimna hu lianpi le a lauhuai suksiatna hong kuankhia hi. ^b
2 A melhoih mahmah a ngek ngi-ingei
Zion Tanu ka susia ding hi. ^c
3 Tuanu langah tuucingte a tuuhonte uh tawh pang uh a;
a kimkotah a puanbuk uh lamin, ^d
amau neihsa ciat a cing ding uh hi,” a ci hi.
4 “Tuanu do dingin kithawi un!
Ding un sun laitakin va sim un!
Ahi hangin alasai, khua khingta a,
nitak niliap saupi liap keii ta hi.
5 Tua ahi ciangin ding un, va zan simin
a kulh muanhuaite uh va susia ni! “ci ding uh hi.

6 Thahatpen TOPA gen hih ahi hi:

“Sing phuk unla Jerusalem sim nadingin ^e
phungin ciang un.
Hih khuapi netniamna tawh kidim hi;
dan kituaksak pelmawh ding hi.
7 Tuikhuk panin tui a phulkhiat bangin
tuanu sung panin gitlohna a phulkhia hi.
Tuanu sungah ngongtatna le siatna kiza den a, ^f
a cinatna le a liammate ka mu den hi.
8 Jerusalem aw, kidawm in,
na kidop kei leh nang kong kiheisan dinga,
kuama ten loh nadingin
na gam ka hawmsak ding hi,” a ci hi.

9 Thahatpen TOPA gen hih ahi hi:

Israel a baanglaite lenggah lawh bangin
lokhia kiuhkeuh unla;
mi khat in lenggah a kaihkhop bangin
a hiangte tungah na khut uh van kik un,” hong ci hi.
10 Kua hopih in vauhilh thei ding ka hi hiam?
Kua in ka thu ngai ding hiam?
A zak theih loh nadingun ^g
a bilte uh a bing ^{▼▼6.10 Hebrew ah Vunat loh} hi. ⁱ
Amaute tungah TOPA kammal zak thadahhuai-a, ^j
nuam a sa kei uh hi.
11 Ahi hangin TOPA thangpaihna tawh ka kidim a, ^k
ka thuak zo nawn kei hi.
“Lamdunga naupangte tung le
a kikaikhawm khangnote tungah ka hehna ka sungkhia hi; ^l
zite le pasalte pitek luate le putek luate tawh ^m
kiman khawm ding hi.
12 Tua gama teng mite tungah
ka khut ka zankhiat ciangin
a inn a lote uh le a zite uh ⁿ
midangte tungah kipia ding hi.” ^o

TOPA in cikhia hi.
13 “Aneupen pan alianpen dong
a vekpi-un met nading ah huaiham uh a;
kamsangte le siampite in
a vekun a kibangin zuau a phuak uh hi. ^p
14 Amaute in ka mite liamma
a nasia lo bangin tunsak uh a,
kilemna om nai lopi,
‘Kilemna, kilemna,’ a ci uh hi.
15 A muhthadahhuai-a a gamtatna uh maizum beek lo uh ahi hiam?
Neukha zong maizum lo uh a,
kisuannazia ding nangawn a thei kei uh hi. ^q
Tua ciangin a puksate lakah puk uh a,
amaute dan ka thuaksak ciangin a kilawnsuk ding hi,”

TOPA in a ci hi.

16 TOPA thugen hih ahi hi:

“Lamkabomte ah dingin en unla,
tanglai lampite dong un,
lam hoih koi pen hiam cih dongin tawnpah un, ^r
tua ciangin na hinna un tawldamna a mu ding hi. ^s
Ahi hangin, ‘Tua lampi tawn dah ni,” na ci uh hi.
17 Note hong vil ding mi ka koih a, ^t
‘Pengkul aw ngai un!’ ka ci hi.
Ahi hangin, ‘Ka ngai kei ding uh hi,’ na ci uh hi. ^u
18 Tua ahi ciangin minamte aw, za un;
tecite aw,
amau tungah bang piang ding hiam, thei un.
19 Leitung aw, za in; ^v
keimah in amaute sawmna gah ahi siatna,
hih mite tungah ka puak ding hi, ^w
bang hang hiam cih leh amaute in ka thute ngai loin
ka thukham a nial uh hi.
20 Bang dingin Sheba pana gimnamtui le
gamlapi pana sing namtui thusim ding ka hi hiam? ^x
Na meihal biaknate uh kisang thei lo a, ^y
nong biakpiaknate un kei hong lungkimsak kei hi,” hong ci hi. ^z

21 Tua ahi ciangin TOPA gen hih ahi hi:

“Hih mite mai-ah a maikhak ka koih ding hi.
Tuate tungah pate le tapate a kibangin kimuktu ding uh a;
vengte le lawmte a mangthang ding uh hi,” a ci hi.

22 TOPA gen hih ahi hi:

“En un, leilu-lam panin
galkap kuan khat hong kuan uh a;
leimongte panin
minam lian khat kithawithawi ta hi.
23 Amaute in thal le teipi tawi uh a;
gilo-in kuamah a lainat kei uh hi. ^aa
Amaute sakol tungah tuang uh a,
a huging uh tuipi hawk bang hi;
Zion tanu aw, amaute nang hong sim dingin
galkapte banga hong kuan uh ahi hi,” ci hi.
24 Amaute thu i za khin a,
bangmah i cih thei kei hi.
Lungkhamna in eite hong lencip a, ^ab
numei nau suak ding bangin na hi. ^ac
25 Galte in namsau tawi uh a,
i kimkot lauhuai ahi manin ^ad
gamlakah vakkhia kei unla,
lampi zong tawn dah un.
26 Ka mite aw, ippi puan silh unla
vut lakah kikhuk un; ^ae
i tungah thakhatin
siatna hong tung ding ahi manin
tapa neihsun kah bangin
thum unla kah cihtakin kap un. ^af
27 Amaute na etcian theih nading le
a lampi uh na zia-et theih nadingin
ettelna sik vanin nang kong bawla, ^ag
ka mite siksuangin ka bawl hi.
28 Amaute a vekun a lehdo tentante hi uh a,
mi gensia-in a vak kawikawi uh hi. ^ah
Amaute sumngo le sik hi uh a,
a vekun a sia-in a gamta uh hi.
29 A haknawte a tuikhia dingin,
pumin mei-ah a kizaap hangin
a kisiangsak zo kei hi;
a gilote a kizaapkhia zo kei hi.
30 Amaute a kinial ngun kici hi,
bang hang hiam cih leh TOPA in amaute a nial hi,” a ci hi. ^ai